Normes de atuazion

L articul 107 dl Statut de autonomia vëija danora avisa che l vënie dat ora normes de atuazion al statut y l cuntën la despusizions sun si pruzedura. Aldò de chël che ie udù danora vën la normes de atuazion dates ora cun n decret dl presidënt dla Republica do avëi damandà la tëuta de pusizion de na cumiscion paritetica y do na delibra dl Cunsëi di ministri. La cumiscion paritetica nunzieda dant ie metuda adum da dodesc cumëmbri; de chisc nen iel sies reprejentanc dl Stat, doi reprejentanc dl Cunsëi regiunel, doi reprejentanc dl Cunsëi provinziel de Trënt y doi dl Cunsëi provinziel de Bulsan. Trëi cumëmbri muessa fé pert dla grupa de rujeneda tudëscia. Daujin ala cumiscion di dodesc che ie cumpetënta per duta la cuestions che à da nfé cun la doi provinzies de Trënt y Bulsan o cun la region Trentin-Sudtirol iel mo na cumiscion speziela per la normes de atuazion che à da nfé cun la materies de cumpetënza dla provinzia de Bulsan. Chësta ie metuda adum da sies cumëmbri, trëi ie reprejentanc dl Stat y trëi reprejentanc dla provinzia. Di trëi cumëmbri che reprejentea l stat nen muessa un fé pert dla grupa de rujeneda tudëscia y al cuntrer muessa un di reprejentanc dla provinzia vester dla grupa de rujeneda taliana. A chësta cumiscion ti dijen n generel cumiscion di sies. Chësta cumiscions ne dà nia mé n scëmpl bënsté sun la prupostes de normes de atuazion njiniedes ca dai ufizies dl Guviern cumpetënc a Roma, ma lëura pea canche les vën metudes adum. Duta la normes de atuazion ëssa messù unì ora ntan i doi ani do l jì n droa dl Statut de autonomia, ma la materia fova plu cumplicheda che n pensova y l ne n'ie nia unit a se l dé nscila. L tëmp ntan chël che la normes de atuazion ie unides ora ie perchël dal 1973 nchin ncuei y n ne possa mo śën nia dì che les ie dutes, sce n pënsa aldò de n cunzet de autonomia dinamica y tën cont che l ie de bujën o de utl mudé ora nce zeche pra normes de atuazion bele dates pro.