Contignü prinzipal

Mezzocorona 2009

La nonejima senteda di Trëi Cunsëies ie unida tenida ai 29 d'utober dl 2009 a Mezzocorona y la ie unida urganiseda dal Cunsëi dla Provinzia autonoma de Trënt sota la presidënza de  Giovanni Kessler.

Ala senteda di Trëi Cunsëies ti ie jita danora ai 8 de setëmber dl 2009 na senteda dla cumiscion interregiunela, metuda adum da set reprejentanc per uni cunsëi. Coche udù danora dal regulamënt ntern à la cumiscion ejaminà la 26 mozions prejentedes nchin ai 24 de lugio dl 2009 dai/dala cunselieres y dai cumëmbri dla jontes di trëi raions per fé ora sce lascé pro la tratazion tla senteda di Trëi Cunsëies, y sun la basa de chësc ejam àla pona njinià l orden dl di dla senteda di Trëi Cunsëies.

Dla 26 mozions prejentedes ie 25 unides lascedes pro ala tratazion tla senteda di Trëi Cunsëies y scrites ite al orden dl di, ntan che una ie unida refudeda dala cumiscion. La 25 mozions scrites ite al orden dl di ie unides metudes adum sota chësta tematiches o materies per sauridé i lëures y per fé a na moda che la descuscion tla senteda di Trëi Cunsëies fosse n generel plu trasparënta: afares istituzionei (3), ativiteies economiches, ambient y funtanes de energia (8), trasporc y zirculazion (5), cultura, istruzion y nrescida (5) y oradechël politiches sozieles y lëur (4).

Tla senteda di Trëi Cunsëies di 29 d'utober dl 2009 iel unit apurvà 24 dla 25 mozions scrites sun l orden dl di, 14 de chëstes cun duta la ujes a una. Una dla mozions che revardova l svilup de na cunescënza miëura dla rujenedes tudëscia y taliana ne ie ntantsce nia unida apurveda.

Coche udù danora dal regulamënt ntern dla senteda di Trëi Cunsëies presenterà i presidënc dla Provinzia autonoma de Bulsan, dl Land Tirol y dla Provinzia autonoma de Trënt do n ann dala ultima senteda, tres l presidënt a chël che ti toca (uel dì te chësc cajo l presidënt dl Cunsëi dla Provinzia autonoma de Bulsan, ajache la senteda di Trëi Cunsëies che vën unirà tenida a Maran ai 30 de merz dl 2011), na prima relazion scrita sun l stat d'atuazion, da pert di trëi guvierns provinziei, dla mozions apurvedes dala senteda cunjonta. Na segonda relazion unirà pona data ora al plu tert 60 dis do la proscima senteda cunjonta di trëi cunsëies.