Salut

Stimada zitadina, stimé zitadin,

bëgnodüda, bëgnodü tla plata web dl Consëi provinzial! Chësta é la sënta virtuala dl organn rapresentatif plü important dla Provinzia de Balsan. Por mè él n onur ester le presidënt de chësc organn y i me porvarà de ademplì chësta inćiaria cun imparzialité, ti lascian lerch a düć i partis che fej pert dl Consëi.

I grups consiliars che tol pert ala discusciun  tl plenum y inće defora da chësc organn ne fej nia ater che rapresentè les usc desvalies dla sozieté de chësta Provinzia y vigni usc se mirita de gnì ascutada sö y tuta söl scerio. Chësc vëgn fat tl inom de Os düć, stimades zidadines y stimà zitadins, canche le Consëi provinzial – le post olache al vëgn fat discusciuns y tut dezijiuns – elaborëia y aprovëia leges o dà indicaziuns al Govern provinzial y controlëia le laûr dl organn esecutif. Döt chësc fajunse cun engajamënt, vignun y vignöna cun so orientamënt politich ch’inultima corespogn al orientamënt de sü litadus y de sües litadësses.

Dal confrunt inanter minunghes politiches, audanzes y speranzes desvalies che röia tl Cosëi provinzial a na sintesa do discusciuns lunges y val’ renunzia – ci ch’é la normalité te na democrazia – nàscel les leges che regolamentëia la vita y le laûr te chësta provinzia, les diretives dl Govern provinzial – sciöche preodüdes dales moziuns di aconsiadus y dles aconsiadësses o dales leges-aodanza indirizades al Parlamënt. Chisc y tröc d'atri documënć ciafarëise te chëstes plates internet, danter l’ater inće i protocoi integrai dles sentades dl Consëi provinzial, por che i podëis odëi avisa ći che i fajun. Ala fin laurunse pö te Osc inom.

Porchël Ves inviëii a dè na odlada a nostes plates web acioche i podëis Ves fà n’idea de ći che les porsones che ëis lité fej te Osc inom. Le Consëi provinzial se deura tres plü gonot ala opiniun publica, invian i rapresentanć de categories desvalies - chël ô dì Os düć, – ales aldiziuns tl plenum y ales sentades dles comisciuns por ascutè sö sües minunghes. Y avisa tan important y dërt él che la sozieté instëssa, chël ô dì Os düć, stimà zitadins y stimades zitadines, tolëis l’ocajiun de chëstes “portes tres davertes” y gnëis a vijité le Consëi provinzial personalmënter o inće ma te na vijita virtuala.

Stimades zitadines y stimà zitadins, i Ves inviëii porchël de gnì a nes ciafè, fajan na vijita virtuala o inće gnon personalmënter, ćiodiche les sentades dl Consëi provinzial é davertes al publich. A s’odëi tl plenum!

Mauro Minniti
Presidënt dl Cunsëi dla Provinzia Autonoma de Bulsan