Cont dla vita

Nasciù dl 1963 a Foligno, maridà cun Loredana, doi mutons: Massimo (nasciù dl 1995) y Manfredi (nasciù dl 2000). L ie stat vize-presidënt provinziel de AN, l à scumencià si mpëni politich dl 1977 deventan dl 1985 secreter provinziel dl Fronte della Gioventù, i jëuni dl partit, y coche cunselier cumenel a Bulsan, ncëria dejëuta dal 1989 al 1994. Dl 1995 iel dala pert de chëi dla ëuta de Fiuggi. Dal 1994 tl Cunsëi regiunel y tl cunsëi provinziel, capofrazion de Alleanza Nazionale te tramedoi assemblees. Śën te si cuarta legislatura iel l cunselier provinziel de rujeneda taliana che à chësta ncëria da plu giut. Tla legislatures passedes àl presentà milesc de nterogazions y plu che caranta dessënies de lege; danter chëstes nce teles che reverda la toponomastica taliana te Südtirol, la istituzion di cuncorsc de stude sun la foibes y sun l terorism te Südtirol, la defendura di talians coche mendranza te Südtirol, la mudazions al Statut de autonomia. Espert te ciamps sciche l frabiché soziel, na tematica sun chëla che l à presentà cater dessënies de lege y na lingia de relazions de mendranza, l ie stat bon de arjonjer truepa mudazions ala normativa a bën di fitadins dl IPES y de chi che ulëssa l deventé. D'autra tematiches liedes a si scumenciadives de lege reverda l cumbat contra la leucemies, sauridanzes per i jëuni y la persones atempedes, ma nce l cumbat contra l avanamënt di priejes de vita. Ël ie oradechël stat l prim a sustenì cun n dessëni de lege, l'unificazion dla cater aziendes saniteres te Südtirol, che se à pona purtà pro set ani do. Dl 2005 iel stat candidat ambolt a Maran, ulache l viv, giatan l 42% dla ujes. Minniti à pubblica cater libri: "Prove di golpe (bianco) in Alto Adige" (2000, sun la cundizion dla populazion taliana tla Provinzia de Bulsan), "Il Concetto e il Progetto" (2006 ulache l se fej pensieres sun coche dassëssa vester l svilup di partic de man drëta y dl zënter-man drëta), "Foibe" (2007, dedicà ala vitimes giulianes, istrianes, dalmates) y "Martiri Invisibili" cun chël che l uel purté ala lum la storia n cont dla vitimes dl terorism de Südtirol di ani cincanta y sessanta tres i separatisć. Cunfermà pra la veles provinzieles dl 2008 cun 4.039 ujes. Dal 18 de mà presidënt dl Cunsëi.