Urzì, Alessandro (Futuro e Libertà - Zukunft und Freiheit - Dagnì y libertè) (4)

Nasciù ai 7 de mei dl 1966 a Bulsan y residënt iló. Jurnalist prufesciunist dal 1991; l à scumencià a cunlauré dal 1985 cun "Radio Nbc Network"; danter l 1986 y l 1993 iel stat redadëur de "Videobolzano 33", de chël che l à menà ani alalongia la nutizies; l à pona laurà pra "Il Mattino dell'Alto Adige". L ie stat curespundënt dl Trentin-Sudtirol de "Il Giornale" de Milan ti tëmps dla direzion de Indro Montanelli; cunlauradëur dla revista "Il Borghese", dl'ANSA, dl "Alto Adige", de "Italia settimanale".
De nuvëmber dl 1998 iel unì lità cunselier regiunel y provinziel per la lista de "Alleanza Nazionale/Il Polo degli Italiani". Cunfermà dl 2003 (for per la lista "Alleanza Nazionale") y pona inò lità per la terza legislatura ai 26 d'utober 2008 per la lista dl "Popolo della Libertà". Cun 7.891 ujes iel l cunselier dla grupa de rujeneda taliana plu lità. L fej pert dla I y dla III cumiscion legislativa.
D'auril dl 2006 iel unì numinà dal presidënt Gianfranco Fini "Commissario provinciale della Federazione provinciale di Alleanza nazionale". De fauré dl 2007 iel unì lità dal cungres provinziel dl partit presidënt provinziel de "Alleanza Nazionale", na ncëria che l à abù nchin che l ie unì a se l dé la fundazion dl "Popolo della Libertà", de chël che "Alleanza Nazionale" ie jit a fé pert da merz dl 2009 inant.
De mei dl 2010 se al candidà al Cunsëi cumenel de Bulsan, ulache l ie unì lità sun la lista dl PdL. L ie stat l cunselier de rujeneda taliana tl capoluech dla provinzia plu lità n assolut.
De lugio dl 2010 à l presidënt dl PdL Silvio Berlusconi detlarà, zënza scuté su la minonga dl nteressà, la ncumpatibltà dl presidënt Gianfranco Fini cun l "Popolo della Libertà", nce sce l à judà pea mé puec mënsc dant a l mëter su. Tl Parlamënt se à sun na tela metù su la grupes "Futuro e Libertà per l’Italia" dutes ntëur ite ala figura de Gianfranco Fini. Per cuerënza ti iel jit do al presidënt Fini y à metù su nce tl Cunsëi provinziel de Bulsan la Grupa "Futuro e Libertà per l’Italia (FLI)" de chëla che l ie mëinagrupa. L ie unì lità ai 26 de nuvëmber dl 2011 coordinadëur regiunel per l Trentin-Sudtirol de "Futuro e Libertà".

(4) dal 1.1.2011 ne fej l'aconsiadù Alessandro Urzí nia plü pert dla fraziun "Il Popolo della Libertà", deache ara à formè la fraziun "Futuro e Libertà - Zukunft und Freiheit - Dagnì y libertè"