Pichler Rolle, Elmar (SVP)

Elmar Pichler Rolle ie nasciù a Bulsan ai 26 de fauré dl 1960 y viv nce iló. L’oma fova ciasarina, l pere friser y l à mo trëi fredesc y surans. L ie spartì, lià a na cumpania nueva y à doi mutans.
De prufescion iel jurnalist, ala fin iel stat pra l’Athesia Verlag prim redadëur dla zaita dla dumënia "Zett" (1991-1995).
Per 23 ani alalongia - dal 1985 al 2008 – iel stat cumëmber dl Cunsëi de chemun de Bulsan. Danter l 1995 l 2008 iel stat vizeambolt dl capoluech de Sudtirol. Da auril dl 2004 a auril dl 2009 iel stat sëurastant dla Südtiroler Volkspartei, presidënt dla grupa de Cunsëi dla SVP tl Cunsëi provinziel y tl Cunsëi regionel, cumëmber dl diretif dla SVP, cumëmber dla prima y terza cumiscion legislativa dl Cunsëi provinziel, cumëmber dla cumiscion che cunvalidea la lites, cumëmber dla cumiscion per l regulamënt ntern dl Cunsëi provinziel. Cumëmber dla segonda cumiscion legislativa dl Cunsëi regionel. Presidënt dla cumiscion d’inrescida sun i caji de coruzion tl Istitut per l frabiché soziel (2010).
Sciche ulentariat se dal ca per la "Südtiroler Sporthilfe" y fej l prejentadëur o ie a cë dl ufize stampa de truepa manifestazions sportives. L ie l presidënt dl "Bozner Altstadtfest".
D'utober dl 2008 iel unì lità tl Cunsëi provinziel cun 24.300 ujes de preferënza.