Bizzo, Roberto (Partito Democratico - Demokratische Partei) (2)

L ie nasciù l ann 1955, maridà, à na muta y sta a Bulsan. Si streda prufesciunela y privata ie senieda dal mpëni soziel y de solidarità, a pië via da si culaburazion tla "Azione Cattolica" nchina a stlù ju si studium da njenier tla Università de Bologna.
L ann 1989, sota l ambolt Valentino Pasqualin, devëntel mëinagrupa tl Cunsëi de chemun dla zità de Bulsan, l ann 1991 vëniel lità secreter provinziel dla DC. Te chësta funzion restel nchin l ann 1993, nchin ala costituzion dl "Partito Popolare".
Ti ani 1990 se tirel zeruch dala vita politica y se dà ca per l ulentariat y si mestier da njenier. De chëi ani ie n valguni di frabicac y cuatieres plu mpurtanc che l à fat: l zënter dla pluania Don Bosco cun la biblioteca "S. Amadori", l zënter provinziel per la revijion di auti che ie unì premià pra l 15ejim cuncors nternaziunel "Sistema d'Autore", la pagoda dla autostreda dl Prëner a Bulsan-Sud, l teater Cristallo y la culaburazion cun l Studio Kenzo Tange de Tokio.
L ann 2000 val inò tla politica. Sota l ambolt Giovanni Salghetti-Drioli iel assessëur per i lëures publics dl chemun de Bulsan y nvieia via n valguni di proiec plu de mpurtanza di ultimi dejeneies: l cialé ora nuef dla plaza dl tribunel, la nfrastrutures per i raions abitei Firmian, Rosenbach y Casanova, la dertureda de frabicac de scoles, danter chisc nce la scoles "Pestalozzi", "Goethe", "Tambosi", "Manzoni" y "Leonardo da Vinci" y nce la palestres dla scoles "Rosmini" y "Leonardo da Vinci", la scoles nueves cun dut cie che l toca leprò, sciche la scola elementera Don Bosco, la scoles elementeres, la scolines y la scolina per i popsc dl raion abità Firmian y St. Johann y de mo n grum d'autri.
L ann 2005 vëniel lità sciche prim de si lista "Margherita-DL" tl cunsëi cumenel de Bulsan, de fauré dl 2006 devëntel secreter provinziel y cumëmber dla direzion naziunela dl partit. L ie un di fundadëures recunesciui dl "Partito Democratico" y fej pert dla direzion.
Ël liej gën dut cie che l abina. I scritëures che l à l plu gën ie: Pirandello, Andrea Camilleri, Margherite Yourcenar, n valgun scritëures dl'ultima generazion sciche Gianrico Carofiglio. Permò liet al: "La coscienza e il potere" de Giuseppe Scoppola.
Ël ie apasciunà di crëps y dl sport da d'inviern y ama la cumpania. L ie da for n fan dl AC Milan, ama d'uni sort de mujiga, dantaldut i Dire Straits, Genesis, Skin, R.E.M., Vasco, De Gregori, Ligabue, Gianna Nannini.
 

(2) Dai 2 de fauré 2010 mpede la cunseliera provinziela Barbara Repetto che ie tumeda da si ncëria ajache l ie unì desmustrà y deltlarà che la ne fova nia da lité (sentënza dla Chëurt de Cassazion plu auta)