Tl'aministrazion lëura ntëur n 50 cunlaurantes y cunlauranc, che se cruzia, do la cultrines, che duta l'ativiteies dl Cunsëi provinziel y de si organs vënie dejëuc sciche toca. L lëur se damanda n gran mpëni, da una pert, ajache i cunselieres svilupea n'atività scialdi viva cun i mesuns che i à da garat, sciche dessënies de lege, mozions, nterogazions,  y dal'autra pert ënghe ajache, pervia di regulamënc segurei dala costituzion n cont dl'adurvanza dla rujenedes taliana y tudëscia tla Provinzia de Bulsan-Südtirol muessa duta la ates dl Cunsëi provinziel unì scrites tla doi rujenes y nce ciancedes simultanmënter tla sentedes dl plenum, dla cumiscions legislatives  y d'autra cumiscions. Chësta situazion se damanda, sce n la cunfruntea cun d'autri parlamënc regiunei o provinziei, n lëur scialdi majer y giustifichea nce la istituzion de n ufize de traduzion aposta.

A cë dl'aministraziondl Cunsëi provinziel ie l Secreter generel, che ie diretamënter sometù ala Presidënta dl Cunsei provinziel. L Secreter generel mëina inant l secretariat dl Cunsëi provinziel y coordinea l'atività de dut l aparat aministratif. Dlongia  l secreteriat dl Cunsëi provinziel cun si servijes njuntei (servisc stampa, servisc zerimonies, relazions publiches) vëij l model dl'urganisazion mo dant trëi ufizies che fossa l ufize afares legislatives y legai, l ufize aministrazion y l ufize traduzions, che à duc n si diretëur/na si diretëura.