Aministraziun dla provinzia:
La defenüda zivica ejaminëia les lamentanzes, che reverda la aministraziun provinziala y po controlè les ativitês de düć i ofizi y di posć de sorvisc dla aministraziun provinziala. Laprò alda inće i ënć publics inćiarià dala Provinzia sciöche por ejëmpl l’Istitut por le frabiché abitatif IFA.
La defenüda zivica é inće responsabla por l’ejaminaziun de lamentanzes, la consulënza y la intermediaziun de chestiuns, che reverda la sanité, la sconanza dl ambiënt y chestiuns de mituns y de jogn.
Aministraziun aziënda sanitara:
La defenüda zivica ejaminëia les lamentanzes di paziënć che n'é nia cuntënć cun i sorvisc dl setur dla sanité publica y i informëia sön sü dërć y dovëis.
Aministraziun comunala:
La defensuria popolara suratol tla gran pert di comuns dla provinzia inće la funziun dla defensuria popolara dl comun y po, söla basa de convenziuns, controlè l’ativité aministrativa di comuns.
Aministraziun dl Stat:
La defenüda zivica à inće l’inćiaria de ejaminé l’aministraziun statala – ćina ch’al ne vëgn nia nominé le defensur statal – tan inant ch’ara operëia te Südtirol sciöche por ejëmpl l’ativité dl Istitut nazional por la providënza soziala NISF/INPS y l’Istitut nazional por la providënza di dependënć dl’aministraziun publica NFAÖV/INPDAP. La defenüda dla segurëza publica y dla iurisdiziun é stlütes fora.
La prozedöra d’ejaminaziun de chestiuns y les consulënzes da pert dla defenüda zivica vëgn mâ inviades ia, sc’ares toma te süa competënza. Te caji de dübe podëis tres nes cherdè sö. Por d’atri problems ćiarunse de ves indiché l’ofize competënt.
|
